لما اتخطبت في المرة الأولى كان الموضوع معقد جدًا ومش سهل لأن خطيبي فضل يجهز نفسه لمدة ٤ سنين كاملين، ورغم إني اتنازلت عن الشبكة بعد كدا وكنت بشتغل وبساعده إلا إنه فضل يتأخر ويتأخر لحد ما والدي كان جاب أخره زي ما بيقولوا، وهددني في النهاية لو هكمل إنه هيتبرى مني تمامًا، والحقيقة أنا كنت مكملة غصب عني لأسباب تانية أسوأ كتير محدش يعرفها إطلاقًا.

. أنا عملت مُصيبة في حق نفسي وضيعت عُذريـ ـتي مع خطيبي، عشان كدا استنيته كتير أوي، لكنه كان غالبًا قاصد إنه يفضل بالوضع ده عشان الرفض ييجي من ناحيتنا أحنا، وفي الآخر أنهى والدي الخطوبة، وأثناء ما كنت مرعوبة من اللي هيحصلي لو الموضوع اتكشف عرفت إن فيه أكتر من حل البنت بتعمله يوم فرحها عشان تداري على حاجة زي دي.

. وفضلت كام شهر لحد ما جالي عريس تاني، عريس محترم ومعاه فلوس وكويس جدًا في نظر أبويا، لكن في نظري كان مرفوض ومكنتش متقبلاه بأي شكل، ولما أبويا عِرف إني هرفض ضغط عليا بكل الطُرق وملقتش حل في النهاية غير إني أقبله، واتجوزنا وعملنا فرح كبير وكل الناس لاحظوا إني مش متقبلاه، كلهم بلا استثناء إلا العريس نفسه..

الأكثر قراءة الان

زواج مبكر للكاتب/ أحمد محمود شرقاويمنذ 3 أسابيعزواج غريب للكاتب/ أحمد محمود شرقاويمنذ 3 أسابيعالإنترنت المُظلم للكاتب/ أحمد محمود شرقاويمنذ 3 أسابيع

كان طيب وقليل الكلام وزي ما بيقولوا عليه ساذج شوية، وفضلت خايفة ومتوترة لحد ما مرت الليلة بسلام ومكتشفش أي حاجة، وحسيت تاني يوم بالحرية الكاملة وإني خلاص مش هتفضح ولا هتحصلي أي مشكلة، وحتى لو حصل طلاق في المستقبل هاخد مؤخر محترم وكمان هتجوز كمطلقة ومحدش هيعايرني بحاجة فقدتها..

وبعد أيام بدأت أتعامل معاه بأسلوب مش كويس عشان نوصل لمرحلة الطلاق، أو عشان تيجي منه هو مش مني أنا، لأني كنت واثقة ومتأكدة تمامًا إن أبويا مش هيسمحلي أطلب الطلاق أبدًا، غير إنه مقتنع اقتناع كامل بجوزي (هشام)، وعشت معاه في بيت كبير في الشقة الأخيرة، وكانت تحت مننا شقتين، واحدة لأخوه، وواحدة لابن أخوه الكبير..

وفضلنا على الحال ده لحد ما بدأت أحداث غريبة تحصل في الشقة بعيدًا عن أي مشاكل بينا، كنت كل شوية بسمعه بينادي عليا، ولما كنت بروحله عشان أشوفه عايز إيه كان بيقولي إنه مش عاوزني ولا نادى عليا من الأساس، كنت بعدي الموضوع ومكنتش بركز معاه لحد ما في مرة كنت في الحمام ونادى عليا مرة واتنين وتلاتة، لدرجة إني اتعصبت أوي وخرجت من الحمام وأنا ناوية أعمل معاه مشكلة كبيرة..

لقيته أنكر تمامًا إنه كان بينادي عليا من الأساس، وبدأ الموضوع يتطور أكتر وبقيت بسمعه بينادي عليا وهو مش موجود في الشقة من الأساس، الموضوع اتسببلي في رعب غير طبيعي، وبقيت بحاول أقوله وأقنعه باللي بيحصل لكنه كان دايمًا مش مصدقني وبيقول إني بخرف أو فيه مشكلة في وداني، لدرجة إننا روحنا لدكتور سمعيات وكشف عليا وقال إن معنديش أي مشكلة طبية من الأساس.

. وفضل الموضوع مستمر لحد ما أعصابي فعلًا انهارت ومبقتش متحملة، وتحديدًا في الليلة اللي اضطر فيها يبات برة البيت لما صاحبه اتوفى وفضلت في الشقة لوحدي وسمعته بينادي عليا في نص الليل من الحمام نفسه، ومن الرعب فضلت أصرخ لحد ما أخوه طلعلي وفضل يطمني ونزلني عند مراته تحت لحد ما جوزي رجع، وأول ما رجع عمل معايا خناقة كبيرة واتهمني بالجنون والتمثيل وإن مفيش أي حاجة من اللي بقول عليها بتحصل.

. ومبقتش عارفة أقنعه ازاي ولا أقوله إيه، وتحديدًا بعد ما أبويا اتوفى وشقتنا اتباعت بعد أسبوع من أخواتي وخدت نصيبي اللي يعتبر ملاليم، ففكرة إني أطلب الطلاق بقت مستحيلة لأن مفيش مكان أصلًا هيتقبلني، وبدأت أقتنع إن ماليش غير بيتي هنا وجوزي.. مع الوقت غيرت معاملتي معاه تمامًا، بقيت بسمع كلامه، بحترمه، بقدره، وكل اللي كنت بطلبه إننا نبيع الشقة وناخد شقة في مكان تاني، لأن الشقة دي بقت مُخيفة وفيها مشكلة، ولما لقاني بكلمه باحترام بدأ يسمع مني ويفكر فعلًا إننا نسيب الشقة وناخد شقة في مكان تاني وإنه احتمال يعرضها للبيع.